Опозициските лидери во Малта поднесоа барање до судот, барајќи формално испитување на оф-шор компаниите на двајца блиски соработници и министри во Владата на Џозеф Мускат.
Во пријавата со која се бара испитување на сомневањата за перење на пари се наведени и откритијата на новинарката Дафне Каруана Галиција, која беше убиена во октомври, минатата година. Меѓу доказите напишани на 120 страници се и преписки на застапниците на Конрад Мизи кој беше министер за енергетика на Малта, а во врска со исплата на 1,3 милиони евра на сметка на компанија во Дубаи. Компанијата наречена „Блек 17“ е поврзана со фирми од Панама од кои профитирале двајца министри – Силвио Шембри и Конрад Мизи, пишува Гардијан.
Адвокатот на посочениот министер Мизи, рече дека обвинувањата се политички мотивирани, а во врска со компанијата во Панама кажа дека таа била затворена без никакво тргување.
Опозицијата ги повика посочените министри да се повлечат „Колку подолго ја водат земјата, толку повеќе ја нарушуваат репутацијата на Малта“.
Сопругот на убиената новинарка: Нарачателот на убиството се штити
На 17 месецов, се одбележаа шест месеци од убиството на новинарката Дафне Галиција. Нејзиното семејство верува дека тројцата мажи кои се обвинети за атентатот, го извршиле убиството по нарачака и изразија загриженост дека некои структури во Владата на Малта го заштитуваат оној кој ја нарачал ликвидацијата.
Во првото интервју по смртта на неговата сопруга во автомобил-бомба, Питер Каруана Галиција кажа дека политички интереси ја блокираат полициската истрага и рече дека стравува оти главниот организатор никогаш нема да биде изведен пред лицето на правдата.
„Нам ни е јасно дека тројцата мажи се едноставно извршители. Моите синови и јас не сме убедени дека нашата влада навистина сака да утврди кои го нарачал убиството, бидејќи се плашат дека тие лица се всушност многу блиску до нашата влада. Поради оваа причина ние никогаш нема да ја знаеме вистината“ рече тој во интервју за Гардијан.
Малтешката влада вели дека полицијата докрај ќе го расчисти слуачјот и ќе ги провери сите докази. Министерот за правда нуди награда од 1 милион евра за информација што ќе го открие нарачателот.
Вдовецот зборуваше од семејниот дом во селото Биднија, каде што е под 24-часовна полициска заштита. Toj живее сам бидејќи на семејството му било кажано дека е премногу ризично неговите три сина да останат да живеат на островот каде што пораснале. Тие сега живеат во странство.
По смртта на Дафне, 18 новински организации( Гардијан, Ројтерс, Зидојче Цајтунг, Ле Монд, Њујорк Тајмс) од 15 земји, се здружија да ги продолжат и завршат истрагите што таа ги започна, но и да се обидат да откријат информации поврзани со нејзината смрт. Нивната истрага откри дека новинарката била под континуирани закани повеќе од две децении. Во 2006 бил подметнат пожар во домот на новинарката.
Според два извори вклучени во истрагата, полицајците претпоставуваат дека оној кој ја направил бомбата е сé уште на слобода и дека нарачателот може да има врски со организираниот криминал. Тројцата уапсени за убиството подготвено ја чекале полицијата да ги приведе. Пред да бидат уапсени, телефоните ги фрлиле во водата.
„Потсвесно знаеше дека ова е единствениот начин да биде запрена. Членовите на владејачката Лабуристичка партија ја поттикнаа јавноста да ја снимаат и фотографираат каде и да отиде и ги испраќаа сликите на социјалните медиуми. Поради ова, ретко ја напушташе куќата„ вели сопругот на Дафне..
Против неа биле поднесени дури 47 пријави за клевета.
Галициа која работеше на истрага за документите од Панама, беше убиена од бомба поставена во нејзиниот автомобил.