Поранешниот директор на Бирото за јавна безбедност и ексначалникот на крим-техника на СВР Скопје Горанчо Савевски, кој сè уште е на функција во МВР и не е обвинет во предметот на СЈО „Титаник“ за изборни нерегуларности, според бомбите пуштени денеска во судница, разузнавал и прислушувал граѓани од Куманово, кои ги лоцирал како соработници на Зоран Дамјановски – Циц, тогашен градоначалник и кандидат на СДСМ на локалните избори во 2013 година, објави СДК.мк.

Тој ѝ се јавува на тогашната министерка Гордана Јанкулоска и ѝ кажува за луѓе кои седеле во локал во Куманово.

„Зборуваа за колумна во која се величи Циц. Тоа е прочитано од нивните усни во разговорот на масата. Му даваа поддршка на Циц. Ние ќе тераме до крај“, ѝ вели тој на шефицата.

Јанкулоска му кажува за некој сопартиец кој ѝ рекол дека е на едно место, а за кој Савевски испитал и ѝ вели: „Вие кога сте му се јавиле, он седеше со тие луѓе на друго место“.

Потоа Савевски прави цели анализи, кој со кого се среќавал во Куманово, кога и каде, и ѝ кажува на Јанкулоска дека од „Баба Цана“, па сè до последната пицерија, сите ги прошетал со своите тимови и видел кој за кого агитирал.

Потоа ѝ предлага за „Слободан – Цобе и Бранко“ да утврдат дали се со ВМРО-ДПМНЕ или отишле на другата страна. Тој потоа истражува една „жена со плава коса“ за кого работела во вториот круг на локалните избори во Куманово.

Во еден момент, тој признава пред Јанкулоска дека прислушувал граѓани од Куманово.

Во бомбите кои денеска се слушаат во кривичниот суд за „Титаник“ се слуша и гласот на Зоки Марковски, поранешен командир во полициската станица Центар.

Тој од обвинетата ексминистерка Гордана Јанкулоска бара прераспоредување на партиски полицајци на избирачките места во општина Центар за денот на вториот круг од гласањето за локалните избори 2013 година.

„Еден наш го преместив во Центар со 300 усилби, преку Сашо, Влатко Мијалков. Ми требаат наши, верни, политички чисти, да ги распоредиме по гласачкиве места“, бара командирот на ПС Центар од шефицата Јанкулоска.

Во претпладневниот дел од рочиштето беа пуштени бомби во кои екс министерот за транспорт и врски Миле Јанакиески договара стратегии со партиските соработници за добивање избирачки списоци и методи како да се влијае врз изборните резултати во општина Центар.