„По 12 часа разговори ја добивме спогодбата за реализација, односно, Косово и Србија се договорија за анексот за спроведување на договорот за нормализација на односите. Во рамки на тој анекс страните се обврзаа да ги спроведат сите обврски без одложувања“.
Ова го истакна шефот на европската дипломатија Жозеп Борел по завршувањето на разговорите со лидерите на Србија и Косово, Александар Вучиќ и Албин Курти. Тој нагласи дека Косово ќе треба да пристапи кон давање „самоуправа за српската заедница“.
Борел во својата изјава рече:
„Имавме навистина долг ден во Охрид, им благодарам многу на нашите пријатели во Северна Македонија на големото гостопримство во преубавиот Охрид, крај преубавото езеро, планинините, на фантастичниот поглед. Сигурно ќе се вратиме тука за да поуживаме.
Нашата цел денеска беше Белград и Приштина да се договорат за спроведување на договорот од последниот состанок од 20 февруари во Брисел. Договорот денеска беше на маса со цел да се договориме на каков практичен начин тој да се реализира.
По 12 часа разговори ја добивме спогодбата за реализацијата, односно, Косово и Србија се договорија за анексот за спроведување на договорот за нормализација на односите. Во рамки на тој анекс страните се обврзаа да ги спроведат сите обврски без одложувања.
Преговорите беа тешки, не кријам, па и штом 12 часа се разговарало тоа е и знак за тешкотиите.
Косово се согласи веднаш, и тоа веднаш, да почне во рамки на дијалогот за воспоставување на аранжман за обезбедување на самоуправа за српската заедница на Косово. Страните ја поддржуваат декларацијата
Предложивме поамбициозни точки за договарање, но тој план не се оствари сосема.
Тоа што страните го прифатија, а тоа е договорот и анексот, тоа станува составен дел на нивниот пат кон ЕУ. Страните се согласија дека тоа ќе биде важен дел од нивниот пат кон ЕУ, односно тоа ќе бидат нивни обврски кои доколку не се реализираат, ќе се сносат последици. Но секако, ако се спроведуваат, ќе имаат многу поволности страните на спогодбата
Се работи и за просперитет и безбедност на целиот регион, па и пошироко во геополитички контекст. Во понеделник шефовите на дипломатиите ќе се состанат, а во четврток и петок и лидерите на членките на ЕУ и јас детално ќе ги информирам за денешните разговори.
Косово и Србија мора да ги нормализираат односите, тоа не може веќе да се избегнува, договорот и анексот се во таа насока многу важни и ние ќе работиме напорно на таа реализација“.