Со одлука на Владата, новинарите од денеска ќе можат да добиваат бесплатни информации од Централниот регистер, но во барањата ќе мораат да наведат за какви истражувачки цели се работи. Ова денеска беше соопштено на средбата на новинари со новата директорка на Централниот регистер Марија Бошковска Јанковска.
Во владината одлука е наведено дека новинарите кои работат на истражувања ќе треба да поднесат барање до регистарот кое ќе биде ставено на меморандумот на новинарската организација и ќе содржи потпис и печат од главниот уредник.
Портпаролот на владата, Миле Бошњаковски во изјава за НОВА ТВ појасни дека новинарите нема да треба да ја кажат темата на која ќе работат, туку да дадат генерална насока за какво истражување се работи.
„Нема да ги следиме истражувањата на новинарите, ќе треба да дадете само генерална насока за документите кои ги барате“, рече Бошњаковски.
Обврска на Централниот регистер и Агенцијата за катастар на недвижности е на документите кои ќе ги достават до новинарите, на видно место да назначат дека тие се во функција на истражувачка дејност и не треба да се злоупотребуваат за други цели.
Независниот синдикат на новинарите на почетокот на мандатот на оваа Влада побараа документите од Централниот регистар и Катастарот да бидат бесплатни за новинари затоа што новинарите и медиумите што се работат на истражувачко новинарство плаќаа многу пари за да дојдат до документи.
На пример во Централниот регистар за историјат на фирма се плаќа 1.200, увид во регистарска влошка 760 денари, а обична тековна состојба на компанија 256 денари. За движење на парцела во Катастар треба да се плати повеќе од седумстоти денари. Речиси секогаш новинарите треба да извадат по неколку документи, што беше големо оптоварување за редакцискиот буџет.