Македонскиот спорт има нов херој. Не само во моментот туку и во перспектива. Сè уште не е полнолетен, а веќе е европски шампион. Младиот член на боречкиот клуб „Лирија“ (Слобода) од Скопје се врати со златен медал од континенталното првенство во кадетска конкуренција во Фиренца. Во негова чест се организира дочек на граничниот премин Табановце, но и на платото пред споменикот на Скендербег.
Алили во Фиренца оствари четири победи. Походот по златното одличје го почна со убедлив триумф (10:0) против Полјакот Оскар Кулчицки во квалификациите во категоријата до 48 килограми. Во четврт-финалето го елиминира Андреј Витан од Молдавија со 12:10, во полуфиналето славеше над Лука Гугешашвили од Грузија со 6:2, а во борбата за титула и над Ерменецот Харутјун Ховханисјан со 7:6.
Младиот борач доби честитки од сите страни. Од спортската и севкупна јавност, од колегите борачи, од политичкиот врв во земјата која повторно се обедини по нецел месец од втората титулата на ракометарите на Вардар во Лигата на шампиони. Ги заслужи до една како поттик за уште понапорно темпо на работа во иднина и за жетва на медали на меѓународната сцена, за обединување на мултиетничкото општество, на подарената причина за горделивост на сограѓаните и, на крајот на краиштата, за амбасадорската мисија што совршено ја заокружи.
Ден по враќањето од Италија, Алили го мина по приеми. По гостувањето на градоначалникот на Чаир, Висар Ганиу, тој ја прифати покана и ги посети градоначалникот на Скопје, Петре Шилегов и директорот на Агeнцијата за млади и спорт (АМС), Дарко Каевски кој најави дека на петочната седница на Советот на институцијата со која раководи ќе предложи парична награда од еден милиони денари за златниот тинејџер и неговиот тренер.
Владата, пак, на Република Северна Македонија на 141. седница донесе одлука да додели еден милион денари (околу 16.000 евра) за Бесир Алили и 300.000 денари (околу 5.000 евра) за неговиот тренер за постигнатиот успех на шампионатот во Италија. Но, тоа не беше и единствен усвоен предлог за парична награда на „Илинденска“ ББ. За новата, втора, освоена титула во ракометната Лига на шампиони, потврдена е најавената награда за Вардар од 30 милиони денари (околу 500.000 евра).