Бразилскиот претседател Мишел Темер е обвинет за попречување на правдата и за водење криминална организација, а освен него обвинети се уште осум лица, меѓу кои и двајца членови на неговиот кабинет и шестмина бизнисмени кои се веќе во затвор.
Државниот обвинител Родриго Жанот вчера ја обвини Партијата на Темер, дека примила околу 190 милиони долари мито за да обезбеди влијание.
-Темер ја давал потребната стабилност и сигурбност на криминалниот апарат и истовремено се појавува како лидер и основач на организацијата, наведува Жанот во обвинението пред Врховниот суд на Бразил.
Во писмената изјава, Темер ги нарече обвиненијата апсурдни како и тоа дека државниот обвинител ја продолжува својата неодговорна политика за да ги прикрие своите пропусти, а неговата партија исто така ги отфрли обвинувањата.
Како актуелен претседател, обвинението против Темер ќе биде процесуирано само доколку две третини од Долниот дом на Парламентот гласа тој да биде сменет од функцијата. Кога Темер беше обвинет во август, Парламентот го кочеше судскиот процес.
Истиот обвинител во средата соопшти дека бразилската влада со години била водена како картел уште од администрацијата на претседателот Луис Игнасио Лула де Силва, од кога и почнала практиката на поткупување за политичко влијание.