Металург со пораз ги заврши домашните настапи во Лигата на шампиони за оваа сезона. Ракометарите од Автокоманда загубија во СЦ „Борис Трајковски“ со 29:33 (полувреме 12:15) од Силкеборг и со само една победа во групата Ц ќе патуваат во Прешов кај тимот на Татран во последното коло. Воведните 0:4 на данскиот состав, се чини, го решија победникот. Се потоа беше рутински одработено од играчите на Петер Бредсдорф Ларсен додека тимот на Данило Брестовац, и покрај желбата, немаше сили за сензација. Згора на тоа играше и без капитенот Мартин Велковски, а присутна беше и нервоза на теренот како последица на судиски одлуки што, според тренерот на металурзи, не треба да биде дел од млад тим каков има на располагање.
„Треба да работиме и на тој момент. Недозволиво е млади играчи да покажуваат нервоза за судиски одлуки. Нивно е да се борат, за работата на арбитрите има компетентни лица. Тој момент ми пречеше против Силкеборг кој заслужено ги освои бодовите во Скопје. И покрај поразот, верувам дека сме на добар пат. Аплаузите што ги добивме се поважни од резултатот“, рече Данило Брестовац по мечот.
Денешниот пораз е осми за Металург во годинашното издание на Лигата на шампиони на ЕХФ. Вториот македонски претставник во европската клупска елита кој оваа сезона игра со драстично подмален состав е убедливо последен на табелата во групата Ц во која досега го совлада само Чеховски Медведи на домашен терен.
Дури четворица ракометари во СЦ „Борис Трајковски“ го поделија епитетот најефикасен на натпреварот – по двајца во обете екипи. Лидери кај Металург беа Александар Шпенде и Гонсало Рибеиро, кај Силкеборг – Јакоб Арент Ласен и Јохан Плог Хансен.