Црна Гора денеска се очекува да затвори уште едно преговарачко поглавје со Европската унија – за трансевропски транспортни мрежи, со што вкупно ќе затвори 14 од 33 поглавја.
Преговорите за членство земјата ги почна во 2012 година, а властите најавуваат дека сите преостанати поглавја би можеле да бидат затворени до крајот на годинава, со цел членство во 2028 година.
Сепак, аналитичарите предупредуваат дека ваквиот рок е премногу амбициозен, иако постои силна поддршка и од Брисел и од граѓаните, каде околу 70% се за членство во ЕУ.
Во декември Црна Гора затвори пет поглавја, а најголем проблем беше секторот земјоделство, за кој Франција првично имаше забелешки. По директни разговори меѓу претседателите Јаков Милатовиќ и Емануел Макрон, Париз даде зелено светло.
На почетокот на годината беше затворено уште едно поглавје, со што бројот достигна 13.
Во меѓувреме, усвоени се закони за внатрешни работи и за Агенцијата за национална безбедност, кои според ЕУ не се целосно усогласени со европските стандарди. Тоа предизвика политичка криза – опозицијата ги напушти раководните позиции во парламентот, а претседателот Милатовиќ одби да ги потпише законите и ги врати на повторно разгледување.
Сепак, владејачкото мнозинство најавува дека повторно ќе ги усвои, по што претседателот ќе мора да ги потпише.