Преговарачките тимови на Брисел и Лондон постигнаа договор за Предлог-политичката декларација за идните односи меѓу ЕУ и Велика Британија по Брегзит, соопшти денеска претседатлот на Европскиот совет, Доналд Туск.

– Штотуку на ЕУ 27 им ја испратив Предлог-политичката декларација за идните односи меѓу ЕУ и Велика Британија. Претседателот на Европската комисија ме информира дека Декларацијата е договорена од страна на преговарачите и принципиелно на политичко ниво треба да ја одобрат лидерите (на ЕУ), нагласи Туск.

Претходно, официјален претставник на Унијата најави дека постигнатиот Предлог-документ ќе го разгледаат амбасадорите на 27-те земји членки на ЕУ на нивната денешна средба во Брисел.

Тој наведе дека меѓу двете страни се уште има разлики во врска со Гибралтар, но изрази надеж дека сепак документот ќе биде финализиран на време, за да биде разгледан на Самиот на ЕУ в недела, кој првенствено ќе биде посветен на Предлог-договорот за Брегзит постигнат минатата среда. Договорот за Брегзит веќе го одобри британската Влада, а сега останува тој да биде поддржан уште од Парламентот во Лондон и од земјите членки на ЕУ.

Во Предлог-политичката декларација за идните односи, која ќе биде анекс на Договорот за Брегзит, се наведува дека Европската унија и Велика Британија сакаат да го задржат безвизниот режим по Брегзит, додека за подолготраен престој се предвидува воведување на дополнителни процедури за регулирање на статусот на овие лица.

Во Декларацијата, која е на 31 страна, се нагласува и намерата на двете страни за проодлжување на блиската соработка во разузнавачкито сектор, борбата против кибер заканите и истражувањето на криминалните активности.

Со документот се регулира и начинот за надминување на можнити спорови во билатералните односи, продолжувањето на преодниот рок по Брегзит и обврските на Велика Британија кон Буџетот на ЕУ.