Бомбашот-самоубиец кој активира експлозив во такси во неделата во Ливерпул, го подготвувал нападот „најмалку“ седум месеци, соопшти денеска британската полиција.
Силите за борба против тероризмот го истражуваат минатото на Емад ал Свелмин (32) кој загина во експлозијата во неделата околу 11 часот пред женска болница за време на комеморација на жртви од војната. Тој во Британија имал статус на барател на азил кој го прифатил христијанството.
Таксистот кој го заклучил во возилото е полесно повреден.
Полицијата за борба против тероризмот соопшти дека Емад ал Свелмин изнајмил стан во Ливерпул во април и почнал да купува делови за експлозивната направа што ја донел во таксито, се вели во соопштението на полицијата.
Медиумите јавуваат дека инспекторите се обидуваат да утврдат дали бомбата содржела ТАТП, рачно изработен експлозив што се користеше и во атентатот во концертната сала во Манчестер во 2017 година.
Полицијата смета дека се работи за атентат, но според британските медиуми сè уште не е утврден идеолошкиот мотив за нападот.
Иако не е објавен нов елемент во врска со мотивот за нападот, во тек е полициска истрага за утврдување на профилот на напаѓачот, кој досега медиумите го прикажуваа како барател на азил од Блискиот Исток.
Британскиот печат објави дека Емад ал Свелмин пристигнал во Велика Британија во 2014 година, а потоа му била одбиена молба за азил, по што преминал во христијанство.
Неколку медиуми денеска јавија дека некои апликанти ја менуваат верата за побрзо да добијат азил.