Русија денеска пријави нови 8.779 заболени лица со ковид-19 со кои вкупниот број на инфицирани во земјата од почеток на епидемијата ја мина границата од пола милион. Руските здравствени власти досега евидентираа 502.436 пациенти, а само во последните 24 часа починаа 173 граѓани. Вкупниот, пак, број на смртни случаи изнесува 6.532.
Русија е трета држава по бројот на заразени со коронавирус во светот по САД и Бразил. Меѓутоа Русите имаат релативно помал број на починати во однос на заразени лица и во однос на Американците и на Бразилците. Руските власти го образложуваат тоа со, пред сè, преземените мерки како затворање на границите, реорганизација на болничкиот систем и масовното тестирање. Во земјата, како што нагласуваат, досега се реализирани 13,5 милиони тестови.