Бројот на загинати од невремето во Скопје се искачи на 20 лица, а досега се идентификувани 13 од жртвите, велат од МВР. Најголем дел од загинатите се од Сингелиќ, Стајковци, Смилковци и од Арачиново. Се уште се водат како исчезнати 4 лица, а на скопските клиники до утрово беа примени 22 повредени. Полицијата работи на утврдување на идентитетите на останатите жртви.
Полицијата на терен утврдила дека биле заглавени околу 70 возила поради свлечишта кај кучката кај Стајковци према клучката кај Радишани. Свлечиште имало и кај обиколницата кај Ѓорче Петров према Стенковец.
Материјалната штета е огромна. Поплавени се и разурнати куќи, подруми, гаражи, автомобили, угината е живина и домашни животни. Граѓаните од утрово го расчистуваат пустошот што зад себе го остави невремето.
Во 14 часот Советот на Град Скопје ќе одржи вонредна седница на која ќе се разгледуваат мерки и активности за занирање на штетите. Дополнителна загриженост има од најавата дека за попладнево повторно се очекуваат поројни дождови, како што информираат од Управата за хидрометеролошки работи.
„Македонија денеска ќе биде под влијание на влажна и нестабилна воздушна маса од Медитеранот, која попладне и во вечерите часови ќе предизвика променливо и нестабилно време со врнежи од дожд кои локално ќе бидат поројни и проследени со грмежи“, велат од УХМР.
Најмногу дожд во изминатите 24 часа имало во Скопје каде се измерени 93 литри на метар квадратен, соопшти УХМР.