Истражниот центар при Основното јавно обвинителство – Скопје е прилично екипиран и минатата година имавме околу 150 предмети кои што работат во него, изјави претседателот на Основното јавно обвинителство – Скопје, Гаврил Бубевски.
Во Истражниот центар сега работат пет истражители, и според Бубевски, во овој момент има потреба за уште тројца истражители кои треба да бидат регрутирани.
„Специфична е работата на истражители во Обвинителство, така што, треба да ги избереме кадрите кои што може да одговараат токму на таа работа. Ќе отвориме веројатно некаков оглас за тоа и ќе ги избереме“, изјави Бубевски.
Одговарајќи на новинарски прашања, по денешната посета на американската амбасадорка Анџела Агелер на Истражниот центар, каде Амбасадата на САД донираше компјутерска и техничка опрема, Бубевски рече дека нема да кажува специфики на конкретната донација, со оглед дека тоа се алатки што помагаат за истражување на кривични дела.
„Се работи повеќе за техничка опрема, делумно за форензика која ни помага да екстрахираме одредени податоци“, изјави Бубевски.