Говорејќи пред новинарите по итниот самит на сите 27 лидери на ЕУ во Брисел – на кој Унгарија беше единствената членка што одби да ја поддржи заедничката изјава за вооружување на Украина – Орбан рече дека неговата влада ќе спроведе анкета меѓу Унгарците за нивната поддршка за пристапот на Украина во ЕУ.
Имаме таканаречен национален консултативен систем, кој редовно го користиме за собирање на мислењата на граѓаните и сега повторно ќе го користиме, рече тој.
Од 2010 година, владата на Орбан спроведе повеќе од десетина национални консултации на различни теми, од миграција до правата на ЛГБТК+.
Ова се поштенски кампањи во кои сите возрасни Унгарци добиваат писма со прашања и можат да изберат одговори од дадената листа, понекогаш едноставно „да“ или „не“.
Прашањата често се формулирани на сугестивен начин, а огромното мнозинство одговара обично дека се согласуваат со позициите на владата, според унгарските медиуми, додека опозицијата и граѓанското општество ги критикуваат како пропагандна алатка, според Политико.
На пример, една национална консултација за миграциската политика на ЕУ во 2023 година ги праша Унгарците дали го поддржуваат Брисел да создаде „мигрантски гета“ во Унгарија. Помалку од 20 отсто од граѓаните одговориле на истражувањето – но 99 отсто од оние кои учествувале рекле „не“.
Резултатите не се правно обврзувачки, но владата на Орбан ги користи за да ги зајакне своите позиции за спорните прашања, тврдејќи дека имаат поддршка од мнозинството гласачи.
За прв пат, Унгарците имаат можност во Европа да одлучат дали ќе го поддржат членството на Украина во ЕУ или не, изјави денеска портпаролот на унгарската влада Балаш Орбан. Референдумот не би бил обврзувачки.