Советот на министри на Бугарија го продолжи траењето на прогласената вонредна епидемиска состојба, од 1 септември во 2021 година до 30 ноември 2021 година, пренесува БТА.
Според Светската здравствена организација (СЗО), заклучно со 5 август, вкупниот број случаи на ковид-19 во светот надмина 200 милиони, потсетува БТА.
Европскиот центар за превенција и контрола на болести, пак, укажува дека вкупната инциденца на ковид-19 во Европската Унија (ЕУ) и Европската економска област за периодот од 2 до 8 август изнесува 209,2 на 100.000 жители во споредба со 214,0 на 100,000 една недела претходно, додека вкупниот морталитет изнесувал 6,3 смртни случаи на еден милион жители во споредба со 4,7 смртни случаи на еден милион жители во последната седмица од месец јули.
Ширењето на ковид-19 во Бугарија го означува почетокот на новиот, четврти, пандемски бран. Сите области се погодени од новиот коронавирус, а во 50 проценти од областите инциденцата е над 100 на 100.000 жители. Случаи на ковид-19 се дијагностицираат кај луѓе од сите возрасти, но и кај медицинскиот персонал.
Со прва доза на вакцина до 14 август во земјата биле опфатени 20,1 проценти од возрасната популација, а целосно се имунизирале 18,2 проценти од населението. Продолжувањето на вонредната епидемиска состојба и спроведувањето на анти-епидемиски мерки во земјата има за цел да го намали влијанието на ковид-19 врз јавното здравје и здравствениот систем, земајќи го предвид реалниот ризик од ширење во Бугарија на разни варијанти на САРС-КоВ- 2 со висока инфективност.