Втората најсилна партија во Бугарија, Продолжуваме со промените на поранешниот премиер Кирил Петков, се откажа од обидот да формира нова влада, поради што продолжува политичката блокада во најсиромашната членка на Европската унија.
Партијата „Продолжуваме со промените“, која е формирана во 2021 година во екот на масовните протести против корупцијата, не ја доби поддршката од Парламентот за листата на национални приоритети што ја подготви во обид да формира малцинска влада со партијата Демократска Бугарија, објави Ројтерс.
Листата на национални приоритети на партијата Продолжуваме со промените ја поддржаа 63 пратеници, а против беа 114 од 240 парламентарци, по што партијата на Кирил Петков најави дека в понеделник ќе му го врати мандатот на претседателот Румен Радев, доделен на нејзиниот кандидат за премиер Николај Денков.
Пратениците од коалицијата околу партијата ГЕРБ на поранешниот премиер Бојко Борисов и проруската националистичка партија Препород беа против, додека три политички опции беа воздржани, вклучително и Бугарската социјалистичка партија, некогашен сојузник на партијата на Кирил Петков.
Коалицијата на Бојко Борисов, која на вонредните парламентарни избори на 2 октомври освои најмногу гласови, но само 67 мандати, во декември не успеа да обезбеди мнозинство во Парламентот.
Бугарскиот претседател Радев сега мора да побара од третата најмоќна политичка опција да формира влада, а тоа е центристичката партија Движење за права и слободи. Доколку и таа не успее да формира влада, Радев ќе мора да го распушти парламентот и да распише нови избори, петти во изминатите две години.
Политичката криза во Бугарија трае од 2020 година, кога земјата беше потресена од протести против владата на Бојко Борисов, каде илјадници бараа елиминирање на корупцијата и политичкото мешање во работата на медиумите и ефективна реформа на судството. Обидите на владата на Бојко Борисов да ги запре протестите со насилство поттикнаа дополнителен гнев и доведоа до подлабока поларизација на општеството.
Од април 2021 година, кога се одржаа последните редовни парламентарни избори, формирањето на стабилна влада е спречено поради острата поларизација меѓу партиите и нивната недоволна сила.
Оттогаш, Радев назначи неколку преодни влади, а единствената во полн капацитет, предводена од Петков, беше формирана по вонредните избори во ноември 2021 година, но нестабилната четиричлена коалиција се распадна по само шест месеци, во јуни 2022 година.
Долготрајната политичка блокада може да го загрози влезот на Бугарија во еврозоната на 1 јануари 2024 година и користењето на фондовите на ЕУ за закрепнување на земјата, а ќе ги одложи и реформите неопходни за борба против корупцијата.