Вечерва Бугарија ќе добие нов претседател или претседателка на државата.
Денес се одржува вториот круг на претседателските избори. Првиот се одржа пред една недела кога победи кандидатот на социјалистичката опозиција генералот Румен Радев, 53 години, екс командант на бугарската воздушна армија и кандидат на Социјалистичката партија.
Цецка Цачева, 58 години, кандидатката на ГЕРБ, демо-христијанската партија на власт, го загуби првиот круг.
Изборите се тест за популарноста на премиерот Бојко Борисов. Борисов, кој е на власт од 2014 година, вети дека ќе даде оставка од функцијата доколку кандидатката на ГЕРБ ги загуби изборите и ќе свика вонредни парламентарни избори. Но ако до оставка не дојде а на изборите победи Радев, опозицијата би можела да се обедини и да ја турне владата.
Во кампањата главна улога играа сиромаштијата, корупцијата, демографската криза и отселувањето на населението. Во Бугарија просечната плата изнесува околу 500 евра.
Цачева ветува стабилност на земјата и продолжување на евро-атлантскиот курс на државата.
Радев тврди дека ќе донесе промени и ќе ги намали растечките корупција и сиромаштија. И дека подобрувањето на односите со Русија не е некомпатибилно со евро-атлантскиот пат на земјата.
Претседателот има мандат од 5 години и неговата улога е пред се протоколарна.
Во Бугарија влезе на сила закон кој ги обврзува граѓаните да гласаат но неизлегувањето на гласање носи само симболична казна.
Околу 6,8 милиони избирачи се повикани да го изберат новиот шеф на државата.