Француската групација Сосиете женерал се повлекува од регионот на Источна Европа од нестратегиски пазари, каде не се во трите топ банки според пазарниот удел, вклучувајќи ја и Македонија.
Како што пишува бугарскиот весник „Капитал“, во овие рамки се продава банката во Бугарија во пакет со уште пет подружници на француската групација во Албанија, Македонија, Црна Гора, Србија и Молдавија.
Весникот наведува дека сите банки добро се управуваат и се со добивка, но истовремено страдаат од слични недостатоци – мали пазари, каде некогаш примамливо високата рентабилност сега се топи, а средината е заситена и во исто време нестабилна поради политичка и регулаторна гледна точка.
Во 2016 година групацијата ја продаде хрватската Сплитска банка на ОТР, а во текот на 2017 година и грузиската. Надвор од предвидениот пакет што ќе се продава остануваат банките во Русија, Романија и Чешка.