„Формално досега не е добиен француски предлог како можно решение за блокадата од страна на Бугарија, затоа што прво се добиваат мислењата на земјите – членки на ЕУ, со кои ние сме во постојана комуникација и оттука нема можност било каков предлог да се достави до Собранието или неговите тела“, објави пред малку шефот на дипломатијата Бујар Османи.
Тој рече и дека евентуалниот Протокол, кој се спомнува како веќе готов документ, можеби е всушност записник од одржување на Меѓувладина комисија меѓу Северна Македонија и Бугарија, која е предвидена со Договорот за пријателство од 2017 година.
„Засега е одржана само една седница на оваа Комисија во 2019 година, и овој записник, кој е единствениот Протокол засега, е јавно достапен веќе три години.
Оттука нема финализиран записник затоа што не е одржана втората седница на Меѓувладината комисија“, вели Османи.
„Јас секогаш сум одговарал позитивно на поканите за настап на Комисијата за надворешна политика, иако не секогаш таму сум се чувствувал добредојдено и пријатно, ниту, пак, сум наидувал на соработка кога се работи за сослушување на избраните амбасадори. Согласен сум наскоро да утврдиме термин и да ги преставам сите прашања од домен на надворешната политика, но притоа, да го повикам претседателот на Комисијата, да ја закаже седницата за избор на неколку клучни амбасадори чие упатување непотребно е стопирано преку незакажување седница на Комисијата за нивно сослушување“, порача тој преку неговиот канал на социјалните мрежи. (С.К.)