Вицепремиерот за европски прашања Бујар Османи, објави видео на неговиот Фејсбук профил во кое наведува дека врши проверка на имплементацијата на проектите што се спроведуваат со средства од ИПА-програмата.
На видеото на неговиот Фејсбук профил е прикажано како првиот човек на Секретаријатот за европски прашања спроведува мониторинг на новоизградениот царински терминал на граничниот премин Северна Македонија–Албанија.
„Како национален координатор за овие средства од ЕУ, мојата улога е да ги програмирам, да ги мониторирам и да ги надгледувам проектите што се имплементираат. Денеска сум во Струга за надзор на еден значаен проект на изградба на царински терминал на граничниот премин „Ќафасан“ меѓу Северна Македонија и Албанија што е изграден со околу еден милион евра од ИПА-програмата“, посочи вицепремиерот за европски прашања.
Османи во видеото појаснува дека Европската унија издвоила околу 1,2 милијарди евра како неповратни средства за Северна Македонија за периодот од 2007 година до 2020 година што се наменети за конкретни проекти и трансформација во европско општество.