Венецуела распоредила воени бродови и беспилотни летала за патролирање на брегот на земјата откако САД испратија три разорувачи во регионот за да извршат притисок врз претседателот Николас Мадуро.
Венецуелскиот министер за одбрана Владимир Падрино во видео објавено на социјалните мрежи најави „значајно“ распоредување беспилотни летала, како и поморски патроли долж карипскиот брег, вклучувајќи „поголеми бродови посеверно во нашите територијални води“.
Овој потег доаѓа во услови на ескалација на тензиите со Вашингтон, кој минатата недела испрати три разорувачи со наведувани ракети и 4.000 маринци во Венецуела за да се справи со трговијата со дрога.
Трамп испрати уште бродови
Во вторник, американски извор за АФП изјави дека претседателот Доналд Трамп испраќа уште два брода на Карибите за да се справи со нарко-картелите.
„Крстосувачот со наведувани ракети „УСС Ери“ и брзата нуклеарна подморница „УСС Њупорт Њуз“ треба да пристигнат во регионот следната недела“ изјави извор на АФП кој инсистирал на анонимност.
И покрај драматичното зголемување на силите, аналитичарите веруваат дека има мали шанси за американска инвазија или американски воздушни напади врз Венецуела.
Се наведува дека на улиците на венецуелските градови, многу луѓе ја отфрлуваат заканата како глумење од страна на Вашингтон.
Мадуро, кој освои трет мандат на изборите во јули 2024 година, обележани со обвинувања за измама и репресија врз опозицијата е цел на Трамп уште од неговиот прв мандат како претседател на САД од 2017 до 2021 година.
Политиката на Трамп за максимален притисок врз Венецуела, вклучително и ембаргото за нафта кое сè уште е на сила, не успеа да го собори Мадуро од власт.
„Мислам дека она што го гледаме е обид да се создаде вознемиреност во владините кругови и да се принуди Мадуро да преговара за нешто“ изјави за АФП аналитичарот на Меѓународната кризна група, Фил Гансон.
Откако Трамп се врати на власт во јануари, нападите на шефот на Белата куќа врз Венецуела главно се фокусираа на активностите на моќните транснационални банди во оваа јужноамериканската земја.
Обвинение дека Мадуро го води Картелот де лос Солес
Вашингтон го обвинува Мадуро дека го води Картелот де лос Солес, картел за трговија со кокаин што администрацијата на Трамп го означи како терористичка организација.
САД неодамна ја удвоија наградата на 50 милиони долари за апсење на Мадуро за да се соочи со обвиненија за дрога.
Минатата година, американските власти запленија авион што му припаѓал на Мадуро и го однесоа во САД, за кој Министерството за правда во Вашингтон тврдеше дека е извезен од Флорида, спротивно на санкциите против Венецуела.
Мадуро го обвини Трамп дека се обидува да предизвика промена на режимот и започна кампања за регрутирање илјадници членови на милицијата.
Илјадници државни службеници, домаќинки и пензионери се собраа во Каракас, главниот град на Венецуела, за време на викендот за да се приклучат на милицијата откако Мадуро ги повика граѓаните да одговорат на „необичните закани“ од САД.
Во вторник, Венецуела поднесе барање до Обединетите нации да интервенира во спорот, барајќи „итно прекинување на распоредувањата на американската војска на Карибите“.
Венецуела во понеделник објави дека распоредува 15.000 војници на границата со Колумбија за борба против трговијата со дрога.
„Венецуела е чиста територија, нема трговија со дрога … нема насади со листови од кока, нема! Нема производство на кокаин“ рече Мадуро во своето неделно телевизиско обраќање до нацијата.
Министерот за внатрешни работи Диосдадо Кабељо објави дека владата распоредува војници за зајакнување на безбедноста во државите Зулија и Тачира, кои граничат со Колумбија.
Во посебна изјава во вторник, министерот за одбрана Падрино рече дека за време на операцијата во североисточниот дел на Венецуела, резултирала со демонтирање на бродоградилиште каде што криминалците имале намера да „произведат полуподморници и чамци за транспорт на дрога по море“ до пазарите во Европа и Северна Америка.