Поранешниот министер за внатрешни работи и директор на Бирото за јавна безбедност, Митко Чавков, ќе излезе од притвор. Апелацискиот суд во Скопје ја потврди одлуката на Кривичниот суд Чавков со недвижен имот да гарантира дека нема да избега ако излезе од истражниот затвор „Скопје“во Шуто Оризари каде издржува мерка притвор, како обвинет за насилствата во Собранието од 27 април, минатата година.
Обвинителството за организиран криминал поднесе жалба на одлуката на Кривичен, но Апелација ја одби со што одлуката станува правосилна.
За сега Чавков останува во притвор во „Шутка“, додека не се попише целиот имот во вредност од 600.000 евра кој го става под гаранција.
Заради обезбедување присуство во текот на постапката се очекува судот да определи и мерки за претпазливост, односно привремено одземање на патната и друга исправа за преминување на државната граница како и обврска еднаш неделно да се јавува во судот.
Претходно Врховниот суд одлучуваше по жалбата на Чавков и го пушти во домашен притвор, но само ден подоцна кога беше подигнато обвинението за 27-ми април, со одлука на Кривичен тој беше вратен во „Шутка“.
Тогаш претседателот на судот извести дека полицијата не го пронашла Чавков на адресата определена од Врховен, а неговата одбрана одговори дека Врховниот суд погрешил и му впишал стан на МВР кој пред повеќе месеци го напуштил.
Чавков е шесто обвинет за терористичко загрозување на уставниот поредок и безбедноста.
Во притвор се и останатите вработени во МВР, шефот на обезбедувањето на Вељаноски, Горан Ѓошевски, и екс началникот во МВР, Оливер Поповски, кои исто така со имот гарантираа дека нема да бегаат. Кривичен и за нив дозволи да се бранат од слобода, но Обвинителството веќе поднесе жалба и за нив. Сите се обвинети за настаните во Собранието од 27-ми април лани.