Македонија вечерва (20,45 ч.) оди по осминафинале на Светското ракометно првенство во Франција. По Тунис на ред е меч со Ангола во кој евентуална победа, многу веројатно, ќе значи и место во нокаут фазата на мундијалот.
„Црвено-жолтите“ се фаворити и во очите на јавноста и во понудата на обложувалниците. Таквата улога на хартија, сепак, ќе треба да се оправда и на теренот. Селекторот Лино Червар нагласува потреба од идентичен пристап како против Тунижаните. Место за еуфорија нема, составот останува ист, а таква мора да остане и страста за нова радост.
Анголците се скенирани од острото око на Хрватот. Прегледани се неколку пати нивни натпревари, издвоени се силните и слаби страни, но заклучок останува предупредувачки. Не толку од потенцијалата закана од противникот колку од сопствената глава. Притоа е наврати 14 години наназад во минатото кога ја освои првата светска шампионска титула со Хрватска на турнирот во Португалија.
„Таму станавме светски прваци, но загубивме од Аргентина. Одговорот е едноставен. Менталитетот на селекците на Балканот е таков. Мечот го почнавме без жар, опуштени и со тактизирање. Е, така не може против никого“, коментира Червар.
Затоа и пораката од неговото лично искуство треба да се прифати без приговор. Само со присебност, со концентрација, со разум и борбеност и „останување на терен“ во тек на сите 6о минути ќе води до посакуваниот епилог.
„Ќе бидам отворен и ќе кажам дека повеќе стравувам од нас отколку од Ангола. Епизодата „Аргентина“ што ја имав со Хрватска не смее да се случи вечерва. Најважна е победата и нема калкуации за нејзин дофат. Така треба да влеземе во мечот што се надевам дека и ќе биде. Ниту одиме на гол-разлика ниту ќе уриваме рекорди“, потенцира трофејниот хрватски стратег.
Ангола беше убедливо поразена од Словенија (25:42) во првиот натпревар во групата Б.
Денеска на СП во ракомет
Група А
Бразил – Полска (14,45 ч.)
Норвешка – Русија (17,45 ч.)
Група Б
Исланд – Словенија (14,45 ч.)
Тунис – Шпанија (17,45 ч.)
Ангола – Македонија (20,45 ч.)
Група Ц
Унгарија – Хрватска (20,45 .)
Група Д
Египет – Данска (20,45 ч.)