Завршете ги работните обврски, набавете грицки и пиво и попладнево пред телевизор дома или договорете друштво и фатете позиција во кафуле. Македонската репрезентација од 17,45 часот го игра првиот меч на Светското првенство во Франција. Противник е Тунис, последниот должник на „црвено-црните“ во списокот со должници, кој во Гдањск го „украде“ олимпискиот сон.
Токму на тој момент се осврна и селекторот Лино Червар и капитенот Кире Лазаров. Двајцата предупредуваат дека ланската елиминација од Игрите во Рио не смее да надвладее и да понесе бидејќи може да биде самоубиствено по македонските ракометари.
„Многупати досега сме гореле во желба да победиме во значајни натпревари. И сме изгореле. Овојпат не смееме да дозволиме такво нешто. Мора да одиграме смирено, интелигентно и да ја користиме секоја прилика што ќе ја добиеме“, порача Лазаров од Мец.
Селекторот Червар е искусен лисец. Предводи трета различна репрезентација на Светските првенства по Италија и Хрватска и точно знае што може да биде предност, а што хендикеп во мечеви како денешниот. Го знае капацитетот на „црвено-жолтите“, го има предвид менталитетот и затоа повикува на смиреност и фокус на сопствената игра наместо на противникот и она што било во минатото. Во таков случај, Македонија би била поголем противник самата на себе отколку Тунис.
„Тунис минатата година го уништи олимпискиот сон. Спомените се свежи, но тоа не смее да н` окупира. Тоа може само н` „убие. Мора да ги потиснеме емоциите од Гдањск и да се насочиме на нашата игра бидејќи таа носи резултат“, предупредува Червар.
Хрватот и со куса анализа на ривалот од што може да се заклучи дека респект е присутен.
„Тунижаните се добро воиграна селекција. Имаат брзи играчи на крилните позиции кои одлично соработуваат со Жалуз. Една од нивните добри страни се полуконтрите и транзицијата, пред се, од одбрана во напад. Го имаат нашиот респект. И мора да е така. Тие играа на Олимпијада што не беше случај со нас. Меѓутоа ние сме подготвени да одговориме соодветно на предизвикот и да покажеме дека добро сме работеле на подготовките“.
Натпреварите од првото коло во нашата група почнуваат со мечот меѓу Словенија и Ангола во 14 часот, а ќе завршат со дербито меѓу Шпанија и Исланд во 20,45 часот.