Али Ахмети со акламација е реизбран за лидер на ДУИ на денешниот четврти изборен Конгрес на партијата. За старо-новиот претседател на интегративците гласаа повеќе од 800 делегати на настанот што се одржа попладнево во СРЦ „Кале“ во Скопје.
„Благодарност за едногласната доверба што ми ја дадовте да останам на чело на ДУИ и во наредните четири години. Уверувам дека ќе ве претставувам со дигнитет како и до сега, рече Ахмети кој беше единствен номиниран за претседателската функција од сите 36 ограноци на ДУИ.
Нагласи дека од 2001 година, со потпишување на Охридскиот договор, е променет политичкиот статус на Албанците во земјата. Албанците тука ги сакаа како потстанари, рече Ахмети од говорницата, но не и како господари на домот. Но, по бројни жртви и пролеана крв, додаде тој, Албанците денес слободно го користат албанското знаме, албанскиот јазик, имаат три универзитети, имаат полиција и војска во кои се достоинствени претставени.
Се осврна и на соработката со партии и претставници на Македонците и кажа дека никогаш не делувале зад грб и никогаш нема да работат со двојни стандарди, туку транспарентно и со почитување на дадениот збор.