Сите набавки што ги направила Државна изборна комисија за парламентарните избори кои се одржаа во декември 2016 се направени преку нетранспарента постапка, односно со преговарање без објавување оглас, објави „Фриинфо.мк“
Според податоците што ги доставила ДИК до Електронскиот систем за јавни набавки, парламентарните избори 2016 година чинеле 1.241.059 евра, а локалните избори 2017 година – 844.774 евра.
За парламентарните избори се склучени вкупно 21 договор, а за локалните избори се склучени 19 договори. Најголеми договори за парламентарните избори се за транспорт и сместување на членовите на Избирачките одбори (406.504 евра), за изработка и печатење на изборниот материјал (390.244 евра) и за транспорт на изборниот материјал (105.691 евра). Кај локалните избори, трите најголеми договори се за изработка и печатење на изборниот материјал (453.659 евра), за транспорт на изборниот материјал (81.301 евра) и за надградба на софтвер (69.203 евра).
Претседателот на ДИК, Александар Чичаковски во изјава за НОВА ТВ вели дека тие функционира преку две програми. Едната е редовна програма за работењето на ДИК, а другата е за програма за избори.
„Ако се сеќавате, парламентарните избори неколку пати се одложуваа и парите ни ги даваа па ни ги земаа. Во конкретниот случај, парите ни беа дадени откако се распишаа изборите и имавме многу кратки рокови. Вака се работи од 2006 па до сега“, вели Чичаковски.
Тој додава дека откако станал претседател вовел неколку измени во работата на Комисијата за јавни набавки на ДИК. Како што вели Чичаковски, порано во оваа комисија членови биле вработени во администрацијата и некои членови на ДИК, но сега, сите членови на комисијата за јавни набавки, биле Членовите на ДИК. Тој вели дека оваа промена е направена за да се обезбеди транспарентност и консензус во одлучувањето.
„Претседател на Комисијата е колегата Атанас Урумов, а членови се колегите Силвана Бонева, Игор Милев, Субхи Јакупи и Бедредин Ибраими. Сите одлуки за јавни набаки се носени на јавни седници со консензус потврдени од сите членови на ДИК. Вака направив затоа што требаше да имаме доверба од сите членови и од сите парии за да може да се спроведат изборите“, рече Чичаковски.
Претседателот на ДИК рече дека за јавните набавки користеле и консултанти сертифицирани за јавни набавки.
„Едниот консултант е од Бирото за јавни набавки, еден е од Собрание, а третиот е од Министерството за информатичко општество и администрација. Сите се сертифицирани за јавни набавки и тие ја подготвуваа целата документација“, додаде Чичаковски.