Американскиот лингвист и филозоф, Ноам Чомски, смета дека Републиканската партија на претседателот на САД, Доналд Трамп, е најопасна организација на светот, поопасна и од Исламската држава, а тоа го објаснува оддалечувањето на актуелната американска администрација од остатокот на светот по прашањето на климатските промени.
Ноам Чомски вели дека е свесен колку е тоа екстремна изјава, но цврсто верува во тоа и прашува: „Дали Исламската држава е посветена на обидите да ги уништи шансите за организирано човеково постоење?“.
Во разговор за БИ-БИ-СИ Чомски забележува дека не само што ништо не се прави по прашањето на климатските промени, туку и се забрзува трката кон пропаста.
Во таа смисла, оценува тој, најзначајниот аспект на изборот на Трамп и не само на Трамп, туку и на републиканците, е токму нивното оддалечување од остатокот на светот кога се во прашање климатските промени.
Изборот на Трамп дефинитивно ќе остави последици во светот, смета Чомски, кој додава дека демократите во САД се одрекле од работничката класа уште пред четири децении, а републиканците кои велат дека не се откажале, всушност се нивниот класен непријател.