Министерот за внатрешни работи Наќе Чулев денеска најави дисциплинска постапка против полициски службеници за утврдување на нивна евентуална одговорност за непостапување за време на полициски час во скопски Чаир.
Одговарајќи на новинарско прашање на денешната прес-конференција во однос на продавницата која вчера била отворена во Чаир, тој рече дека тоа не е во надлежност на МВР, туку на Државниот пазарен инспекторат.
„Дозвола за работење на колонијалите даваат локалните Кризни штабови, но тие дозволи не се замислени за непосредна продажба туку за продажба со достава до домовите. Во конкретниот случај работењето на продавницата е во надлежност на Државниот пазарен инспекторат. Во однос на полцииските службеници кои не постапиле во однос на лицата ќе биде покрената дисциплинска постапка и ќе се утврди евентуална нивна одговорност“, рече Чулев.
Прашан дали МВР утврдило за каква цел портпаролот на ВМРО-ДПМНЕ, Димче Арсовски ја користел дозволата за движење за време на полициски час, Чулев информира дека тој располага со валидна дозвола за движење и оти не е регистрирано дека се однесувал дрско и навредливо.
„Според информации што ги добив од Секторот за внатрешни работи Струмица, посоченото лице располага со валидна дозвола за движење и јас мора да кажам дека МВР не издава дозволи за движење. Дозволите се ингеренции на Министерството за информатичко општество и администрација и со дозвола на Владата овозможено е на сите правни субјекти кои имаат работни обврски или задолженија самите да си издаваат дозвола. МВР не навлегува во валидноста на дозволите, туку само гледа дали тие се оригинални или не“, рече Чулев, додавајќи дека досега не е стигната пријава од страна на посоченото лице дека е следен или дека на каков било начин е неовластено легитимиран од страна на други службеници.