Класичен „фејк њуз“ се информациите дека Кирил Тодоровски ќе биде еден од советниците, затоа што тој нема работен статус ниту во Агенцијата за разузнавање (АР) и јас не можам да го преземам. Се работи за медиумски спин. Мислам дека самата личност поради тоа ќе си покрене постапка пред надлежните органи, одговори техничкиот министер за внатрешни работи, Наќе Чулев на новинарско прашање во однос на информациите објавени од страна на некои медиуми дека советници Синиша Алексовски и Кирил Тодоровски, осомничен во случајот „Титаник“, ќе бидат дел од неговиот Кабинет.
„Никогаш не сум имал намера да го преземам Киро Тодоровски во МВР“, нагласи министерот Чулев на денешната прес-конференција на Мисијата на ОБСЕ, Министерството за внатрешни работи и Советот за етика во медиумите за адресирање на говорот на омраза во медиумите за време на предизборниот период.
Чулев потврди дека за Синиша Алексовски е испратена спогодба за преземање до Агенцијатра за разузнавање, но, како што рече, за него ниту е поведена кривична постапка, ниту е обвинет во некој случај досега.
„Се друго е инсинуации во медиумите во однос на неговиот интегритет. Досега нема ниту обвинителен акт, ниту кривична пријава, ниту е осуден за какво било дело“, рече министерот Наќе Чулев.
Нова ТВ во саботата пишуваше за случајот за трансфер на агентите Кирил Тодоровски и Синиша Алексовски од АР во Министерството за внатрешни работи. Во случајот на Алексовски, според наши извори, спорен е неговиот безбедносен сертификат додека во случајот на Тодоровски, тој, според информации на Нова ТВ, е суспендиран од АР бидејќи не успеал да ги исполни критериумите за безбедносен сертификат.
Во врска со информациите што Нова ТВ ги објави во саботата, следуваше реакција од Тодоровски која ја објавивме на нашиот портал, иако никаде во текстот не тврдиме дека тој сака или планира да биде ангажиран во МВР туку дека таква намера имал техничкиот министер Чулев.