На електронската пошта на Нова ТВ пристигна барање од Кирил Тодоровски за јавно извинување или повлекување на текстот со наслов „Агентите Тодоровски и Алексовски се под суспензија, Чулев сака да ги прибере во МВР“.
„На Вашиот портал на ден 02.02.2020 година во 11 часот и 54 минути во текст на Љубиша Арсиќ: „Агентите Алексовски и Тодоровски се под суспензија, Чулев сака да ги прибере во МВР“, се објавени се груби дезиниформации и лаги во врска со мојот ангажман во Министерсрвото за внатрешни работи. Во целост ги демантирам како лажни Вашите наводи во текстот. Јас, ниту планирам ниту пак имам некаква намера да имам било каков ангажман во МВР ниту пак се наоѓам на некакви списоци на техничкиот министер Наќе Чулев за трансфер од АР“ стои во реакцијата на Тодоровски.
На крајот на мејлот, Тодоровски се повикува на член 13 и член 14 од Законот за граѓанска одговорност за клевета кои се однесуваат на право на демант, одговор или исправка.
Редакцијата на Нова ТВ го објавува ова барање на Кирил Тодоровски со напомена дека никаде во текстот не тврдиме дека тој на било кој начин планирал ангажман во МВР. Туку дека за таков негов ангажман има планови техничкиот министер за внатрешни работи, Наќе Чулев што со оглед на веродостојноста на нашите извори сметаме дека јавноста не е погрешно информирана со нашата објава.