Влегуваме во финалето на изборниот ден од првиод круг на локалните избори. Во попладневните часови, почнувајќи од околу 15 часот, се бележи силно раздвижување на партиските активисти, изјави претседателот на ЦИВИЛ, Џабир Дерала, на почетокот на третата онлајн прес конференција на ЦИВИЛ посветена на изборниот мониторинг.
ЦИВИЛ објави дека од Гази Баба доаѓа извештај според кој едно лице пред едно избирачко место им делело пари на гласачите.
„Се бележи засилена активност со организиран превоз на гласачи до гласачкото место, што според искуството, може да упатува на изборен поткуп или притисоци врз гласачите“, изјави Дерала.
ЦИВИЛ остро протестира поради случаите во кои дел од избирачките одбори во текот на денот ја попречуваа работата на набљудувачите.
„Наш акредитиран набљудувач во Кичево, во населеното место Гарани, бил попречен да ја изврши својата должност. Ова се случува во текот на целиот ден, така што време е да вложиме остар протест против ова флагрантно кршење на демократските стандарди во изборниот процес!“, изјави Дерала и додаде дека со слични предизвици се соочиле и неколку новинари и фоторепортери во текот на денот.
Понатаму, ЦИВИЛ соопшти дека во повеќе избирачки места се бележат партиски набљудувачи кои ја вршат улогата на избирачките одбори, односно тие им покажуваат на гласачите каде да ги стават гласачките ливчиња.
Исто така, ЦИВИЛ соопшти дека од целата земја пристигнуваат извештаи дека на Избирачкиот список има починати лица на ИС. Досега се обработени седум случаи на оваа состојба на ИС.
„Цело време се бележи кршење на изборниот молк. Политичката пропаганда тече, како да е изборна кампања, а не ден на гласање“, изјавија претставниците на ЦИВИЛ на прес конференцијата.
„Со оглед на тоа дека со години се провлекува прашањето околу тоа кое ливче е важечко, а кое не, па често имаме извештаи во кои еден избирачки одбор се изјаснил на еден начин за начинот на кој е пополнето гласачкото ливче, а друг избирачки одбор на сосема поинаков начин, важно е да потсетиме на правилата“, објави ЦИВИЛ.
Организацијата ги потсети избирачките одбори на едно добро познато и сè уште важечко упатство на Државната изборна комисија во кое стои дека „за важечко гласачко ливче се смета и она гласачко ливче од кое на сигурен и недвосмислен начин може да се утврди за која листа на кандидати избирачот гласал“.