Да се разбереме, вакцинацијата кај оние што ја прележале болеста нема да биде опасна, ниту ќе остави некакви последици по нивното здравје. Вакцинацијата ќе биде безбедна и само дополнително ќе го надогради имунитетот во насока на тоа да имаат поквалитетен имунитет, вели д-р Злате Мехмедовиќ
Идејата за вакцинирање на оние кои што имаат поминато 45 дена по прележувањето на болеста потекнува од релевантни институции како што се ФДА – Агенцијата за лекови во САД и Центарот за контрола на болести (ЦДЦ) и тоа е базирано врз основа на студии. Причината поради која тоа се прави не е затоа што немате имунитет, треба да знаеме дека нема имунитет кај сите што ќе ја прележат болеста – кај некои воопшто нема да се создадат антитела и тоа го гледавме кај многу наши колеги на почетокот од пандемијата дека и по прележувањето на болеста не се создадени доволно антитела, вели во емисијата „Само Вистина“ на Канал 5 телевизија, д-р Злате Мехмедовиќ, докторанд по јавно здравје и специјализант по пулмологија на Универзитетската клиника за пулмологија.
Тој додава:
– Kај тие луѓе може да има сериозна опасност ако ги експонирате во затворена средина, па дури и 45 дена после покажувањетo на позитивен ПЦР тест и со тоа сметате дека имаат создадено имунитет, а во затворена просторија, каде е зголемен ризикот, тие повторно да бидат инфицирани и реинфицирани. Ние во нашата држава имаме случаи на луѓе коишто три пати биле позитивни на СарсКоВ2 вирусот и тоа е сериозен проблем.
Според Центарот за контрола на болести, последната студија е затворена на 5 ноември годинава и во студијата се земени предвид прележаните во последните 90 – 180 дена од болеста и оние кои се вакцинирале, како две компаративни групи.
– Онаа група на вакцинираните во овој период – од апликацијата на вакцината до тие 180 дена, имала 5,5 пати помали шанси да биде реинфицирана со СарсКОВ2 вирусот. Зборуваме за лабораториски студии. Со оваа мерка се минимизира ризикот од експозиција на оние коишто веќе еднаш ја прележале болеста. Да се разбереме, вакцинацијата кај оние што ја прележале болеста нема да биде опасна, ниту ќе остави некекви последици по нивното здравје. Вакцинацијата ќе биде безбедна и само дополнително ќе го надогради имунитетот во насока на тоа да имаат поквалитетен имунитет. Не постои никаква безбедносна причина, ниту причина дека ќе биде намалена ефикасноста на нивниот имунитет по апликацијата на вакцината или ќе биде нарушен нивниот имунитет по апликација на вакцинацијата, која би била основа на еден начин да ги отргне овие луѓе од процесот на вакцинација. Препораките на CDC се да се вакцинираат и со прва и со втора доза по прележувањето на болеста, советува д-р Мехмедовиќ.