Напаѓачот Алек Минасијан, кој вчера со комбе удри во група пешаци во Торонто, при што загинаа десет луѓе, а 15 повредени, денеска ќе се појави пред суд.

Против него ќе биде покренато обвинение. Во медиумите денеска беше објавена негова фотографија.

Заменик шефот на полицијата во Торонто, Питер Јуен изјави дека не може да каже која била причината или мотивот за нападот.

При апсењето 25-годишниот Минасијан тврдеше дека има пиштол и бараше од полицајците да го убијат.

Јуен посочи дека продолжува истрагата за инцидентот.

Нападот се случи вчера во 13:30 часот по локално време, кога повеќето вработени излегуваат на пауза. Возилото било изнајмено од компанијата „Рајдер систем“.

Очевидец на настанот изјави дека „возачот дејствувал планирано и сакал да ги убие сите“.

Канадскиот министер за јавна безбедност Ралф Гудејл го оцени инцидентот како „многу сериозен“, без да соопшти повеќе детали. Засега не е познато дали станува збор за сообраќајна несреќа или планиран напад.

Неименуван извор од безбедносните служби на САД изјави дека претпоставуваат оти мотивот на напаѓачот е тероризам.

Како што соопшти полицијата тој претходно не им бил познат на властите како престапник, но според очевидци целиот напад изгледал дека е изведен намерно да предизвика жртви.

Како се случил нападот

Полицијата соопшти дека белото комбе што било изнајмено влетало во пешачката зона околу 13:30 по локално време (18:30 средно европско време).

Според очевидци, комбето удирало се што му се нашло на патот – луѓе, хидранти, поштенски сандачиња.

-Бев сведок на најмалку шест, седум луѓе кои беа удирани и летаа во воздух, изјави очевидец за Би-Би-Си.

Што е досега познато за осомничениот

Многу малку детали засега се објавени за осомничениот за нападот.

Полицијата соопшти дека Алек Минасијан бил од северниот дел на Торонто, од предградието Ричмонд Хил.

Шефот на полицијата на Торонто, Марк Саундерс, изјави на прес-конференција дека тој претходно не им бил познат на властите.

-Сето тоа дефинитивно изгледаше со намера, изјави тој, додавајќи дека е премногу рано во истрагата да се каже дали инцидентот бил поврзан со тероризам. Не исклучуваме ништо. Она што треба да го направиме е да го следиме она што го имаме, бидејќи истрагата е во многу рана фаза, рече тој.

Нападот се случи, додека министрите за надворешни работи на водечките индустриски земји-Г7 – Канада, САД, Велика Британија, Франција, Германија, Италија и Јапонија – разговараа во Торонто.

Канадскиот министер за надворешни работи, Христија Фриленд, изјави дека состаноците на Г-7 ќе продолжат во вторник, според планираното.