Еден од адвокатите на Никола Груевски, Димитар Дангов за ТВ21 изјави дека на неговиот клиент му останала уште можноста да поднесе иницијатива за заштита на законитоста до Јавниот обвинител на РМ, бидејќи нема право на жалба до Врховниот суд.
-Тој како надлежен може да поднесе барање за заштита на законитоста. Поради овој рок, нашата иницијатива ќе ја поднесеме најбрзо што можеме, веднаш по приемот на решението. Иницијативите не се сметаат за ефикасно право средство бидејќи многу ретко ги прифаќа Јавното Обвинителство. Имаме мислење и од Комисијата за дискриминација во кое се советува Суд 1 – Кацарска да ги отстрани недостатоците од мислењето и да извести што има преземено во рок од 30 дена. Истото се доставува и до Републичкиот судски совет. Кацарска има овластување и таа самата да го одложи почетокот на казната затвор од причините во мислењето, вели Дангов за ТВ21.
Тој вели дека барањето до Врховен суд поднесено на 24.10.2018 година во моментов се наоѓа кај Кацарска иако таа, како што вели, требала веднаш да го прати.
Од вчера попладне, Кривичниот суд безуспешно се обидува да го пронајде Груевски и да му го врачи решението со кое му се одбива и последната жалба на одлуката за издржување на затворската казна. Судскиот курир вчера трипати бил на адресата која е пријавена како живеалипте на Груевски, но не го нашла.
Следно е да се обидат в понеделник, кога Груевски треба да се појави на судското рочиште за „Титаник“. Доколку и тоа е безуспешно, тогаш или ќе биде спроведување или по него ќе биде распишана потерница.