Професорот и епидемиолог Драган Даниловски смета декa од наесен ќе има благ сезонски пораст на бројките.
-Во Јужна Африка се појавија нови варијанти за кои се верува дека се позаразени од сегашниот. Исто така има и во САД. Ако тие две варијанти успеат да станат доминанти во светот, веројатно и кај нас еден ден, порастот на бројките би бил малку поизразен, но ништо страшно нема да се случи. Колективниот имунитет што го имаме сретнато е ненадминлива бариера, вели докторот во изјава за ТВ Сител.
Според него ефективниот репродукциски број на заразени со ковид-19 благо расте од 24-ти април.
– За очекување е ваков благ пораст и во наредните денови со оглед на празниците. Гужвите ќе доведат до поголем број, но тоа нема да влијае на епидемиолошката состојба, вели д-р Даниловски.
Даниловски појаснува дека омикрон оди кон тоа да стане ендемски вирус.
-Тој и понатаму ќе биде поопасен од грипот затоа што кај 30 до 40% што го прележуваат вирусот, настануваат пост-ковид компликации. Исто така тој ќе биде опасност за невакцинираните граѓани, информира докторот.
Епидемиологот Даниловски им порача на здравствените власти додека земјата е во „зелена зона“ со пандемијата да го искористи овој период да посвети повеќе внимание на пациентите со постковид-компликации кои ги има во се поголем број, а останатите сегменти како имунизацијата да ги стави во заден план.
И порача на власта да не го преспива летото, туку да го искористи максимално мирниот период.
– Летово не треба да се преспие, треба да се искористи, да се вработи здравствен кадар – доктори и медицински сестри, да се одржат семинари за ракување на апарати за кислородна поддршка, бидејќи видовме дека има импровизирање, да се обезбеди лекот „Пакскловид“, а неопходно е да се направи и соодветен протокол за лекување, порача Даниловски.