Драган Даравелски не е во екстрадициски притвор, изјавија за НОВА од Министерството за правда во Србија. Тој одлуката за екстрадиција ја чека на слобода. Од српското министерство на нашите прашања за текот на случајот Даравелски одговорија:
„Одлучувањето по правните лекови, кои посоченото лице ги вложи, се уште е во тек пред надлежните судови. Кога одлуката на тие органи ќе биде донесена и ќе стане правосилна и доставена до Министерството за правда на Република Србија, ќе биде донесена и конечна одлука за испорачувањето од страна на министерот надлежен за правосудството“, пишува во одговорот од Министерството за правда.
За разлика од српското Министерство за правда, во македонското министерство веќе трет дена чекаме на одговор на истите прашања за кои од Белград добивме писмен допис. Не можевме да дознаеме дали се пратени документи од Скопје, какви се барањата на македонските правосудни органи, упатиле ли некаква жалба.
Поранешниот директор на Царинската управа, беше уапсен во Белград на 24 март. Апсењето беше врз основа на меѓународна потерница која е издадена пред повеќе години, новластите во Белград дотогаш не ја реализираа.
Даравелски е осуден дека проневерил 2,5 милиони евра, додека беше директор на Царинската управа во периодот 1999-2002 година. Тој во Србија најде прибежиште од правдата и успеа да земе српско државјанство уште пред да бидат поднесени кривични пријави против него. Во меѓувреме, државата му го заплени неговиот имот во земјава, но тој продолжи да живее лагоден живот во соседна Србија.
По заедничка акција на македонската и српската полиција тој во 2004 година беше уапсен, но избегна екстрадиција поради тоа што веќе имаше српски пасош.Српските власти не го уапсија и екстрадираа македонскиот граѓанин, иако имаа можност да го направат тоа, особено по потпишувањето на меѓусебниот договор за испорачување сопствени државјани потпишан во 2012 година.
Конфискација беше побарана и од Србија, но властите ниту го апсеа, ниту му конфискуваа имот. Се до 24 март годинава. Сепак неговата екстрадиција и натаму е неизвесна. На потег се српските власти. Иако досегашното искуство со екстрадициите покажува дека не секогаш правдата е пресудна. Многу често клучна улога има политиката.