Двесте терминали за читање на отпечатоци од прсти утре ќе бидат испратени од германската компанија „Дермалог“ во Скопје, а откако ќе минат низ сите царински формалности, најверојатно, во понеделник апаратите ќе бидат во канцелариите на Државната изборна комисија (ДИК), каде треба да биде извршено нивно примопредавање, изјави претседателот на Државната изботрна комисија (ДИК), Александар Даштевски.
Откако терминалите ќе пристигнат во земјата, инженери пратени од „Дермалог“ ќе извршат обука за ракување со нив, а потоа таа обука ќе биде вметната и во планот за едукација на ДИК.
Даштевски е дециден дека сè ќе биде подготвено за локалните избори закажани за 17 октомври, бидејќи дотогаш има два месеца.
На локалните избори во земјата, гласачите за првпат ќе се идентификуваат со вчитување на отпечаток од прст. За набавка на терминалите, како и целокупниот систем и нивното одржување за следните четири циклуси, е потпишан договор со германската компанија „Дермалог“.
До први октомври во земјата сукцесивно треба да пристигнат нарачаните 4.000 терминали за изборите.