Му дадов 300.000 евра на Кичеец уште кога Груевски беше премиер, но тоа не беше мито, туку за консалтинг, напиша црногорскиот бизнисмен Миоград Дака Давидовиќ во писмо до македонската јавност во кое го објаснува разговорот од објавената аудио снимка со Зоран Милевски на Јутјуб каналот „Раце лепливи“.
Српскиот бизнисмен Давидовиќ во отвореното писмо открива дека Кичеец се запознал кон крајот на 2016 година преку угледен белградски бизнисмен кој го претставил како сериозен деловен човек од Македонија кој може да му ја пружи потребната поддршка и логистика за деловни проекти кои сакал да ги реализира во земјава. Тогаш и му исплатил 300.000 евра кои се слушаат во објавениот разговор, а Кичеец за возврат требало да му обезбеди градежна дозвола за изградба на мини хидроцентрала и паркови за енергија од ветер на земјиште што Дака го поседувал во штипско.
„Со оглед дека во конкретниот случај се работеше за проект од повеќемилионска вредност, износот не беше несразмерен со толку голема вредност на проектот. Значи, медиумската квалификација дека се работи за мито е премногу насочена и пресметана, бидејќи во овој деловен однос не постои ниту еден елемент што би укажувал, а камоли одредувал наведена исплата како мито и корупција. Фактот дека наведените парични средства сум ги исплатил на Зоран Милевски во времето на владата на Никола Груевски, а не време во владата на Зоран Заев, исто така потврдува колку написите се невистинити, а над се со цел и монтирани“, пишува Дака.
Понатаму, бизнисменот вели дека Милевски не ги исполнл ветувањета и преземените обврски, а единствено што успеал е да му договори состанок со премиерот Заев, но и од него не произлегло ништо.
„Точно е дека на состанокот со премиерот Заев ги изложив своите планови во врска со изградба на мини хидроелектрана и паркови за енергија на ветер. Меѓутоа, соопштено ми беше дека сите концесии за овој вид дејност сè по повластени тарифи и веќе доделени, упатувајќи ме кај генералниот секретар на Владата, Драги Рашковски да му проверам какви се плановите на Владата за идниот период, врзано за доделување нови концесии. Меѓутоа, ниту до денешен ден не добив информација која би укажала дека во иднина би можел да очекувам реализација на наведениот проект“, пишува Дака.
Од опозициската ВМРО-ДПМНЕ и денеска побараа Заев да каже што разговарал со Дака и го повикаа Јавното обвинителство да го истражи случајот.