Делегација предводена од специјалниот пратеник на ЕУ за дијалог меѓу Белград и Приштина, Мирослав Лајчак и специјалниот пратеник на САД, Габриел Ескобар, пристигнаа во Приштина околу десет часот, а денеска ќе се сретнат со косовскиот премиер Албин Курти, пренесува Економи онлајн.
Покрај Лајчак и Ескобар, во делегацијата се и советникот за надворешна политика и безбедност на германскиот канцелар Олаф Шолц, Јенс Плотнер, како и Емануел Боне, кој е советник на францускиот претседател Емануел Макрон и Франческо Марија Тало, советник на италијанската премиерка Џорџа Мелони. Високите претставници ќе се обидат да го интензивираат дијалогот, во насока на постигнување конечен договор меѓу Белград и Приштина, пишува овој медиум.
Пред неколку дена во Косово престојуваше високиот американски советник Дерек Шоле, а таму беше британскиот пратеник Стјуарт Пич поради дијалогот на почетокот на годината.
Шоле пред неколку дена истакна дека за конечниот договор меѓу Косово и Србија ќе бидат потребни „тешки избори“ и „политичка храброст“.