Директорот на Универзитетската клиника за очни болести, Христијан Дума, ја демантира веста на одредени портали дека „не почитувал препораки за изолација и ставил во опасност свои колеги и вработени на комплексот Клиники од зараза со коронавирус“. Неговата сопруга, како што самиот вели, е во самоизолација во стан на друга адреса и покрај негативниот тест на Ковид-19, а тој десет дена не одел на работното место за што на сведоци упати на колегите од Очната клиника.
На 10 март, само еден ден откако на неговата сопруга и беше одредена самоизлоација, писмено се обратил до Државниот санитарен и здравствен инспекторат (ДСЗИ) за добивање на насоки за натамошно делување како здравствен работник и Директор на Универзитетската клиника за очни болести. Во обраќањето напоменал дека сопругата веднаш се самоизолирала во посебен стан на друга адреса.
„Според она што сте го презеле, постапено е правилно, односно сопругата е во самоизолација во друг стан. За Вас нема посебни препораки, како контакт од втора линија, се додека нема промена на Вашата здравствена состојба“, бил одговорот од ДСЗИ за Дума кој во целост го споделува со јавноста.
Дума во дописот со медиумите најодговорно тврди дека неговата сопруга е во самоизолација на сосема друга адреса и точно 19 дена немаат никаков контакт и целосно ги почитуваа препораките на здравствените власти.