Демократскиот сојуз на Косово (ЛДК) ја одби поканата на премиерот Албин Курти за средба со лидерите на опозициските партии, што треба да се одржи утре, јави дописникот на МИА од Приштина.
Иако кабинетот на Курти, кој информира за поканата упатена до ЛДК, Демократската партија на Косово (ПДК) и Алијансата за иднината на Косово (ААК), не објави која е темата за која би се разговарало на средбата, извесно е дека е во прашање агендата на преговорите со Србија, со оглед дека тоа беше главна тема на вчерашната средба на Курти со специјалниот пратеник на САД за косовско-српскиот дијалог, Габриел Ескобар.
Портпаролката на ЛДК, Сибел Халими изјави за порталот „Газета експрес“ дека Курти за тоа прашање треба да реферира во републичкото Собрание.
„За темата на дијалогот премиерот Курти треба да реферира единствено во Собранието на Косово. Таму ЛДК повторно ќе ги нагласи и своите ставови. За ова лидерите се согласија и на претходната средба“, изјави Халими.
Таа вели дека, за ЛДК, „финалниот договор со Србија треба да биде само околу меѓусебното признавање“.
„Во тој договор за меѓусебно признавање, за уставниот поредок, за територијалниот интегритет и за суверенитетот на државата не може да се преговара“, изјави Халими.
Од ААК вчера соопштија дека нивниот лидер, Рамуш Харадинај ќе оди на средбата со Курти, додека од ПДК изјавија дека за учеството на лидерот Мемли Красниќи на таа средба ќе одлучат откако ќе добијат повеќе детали од кабинетот на премиерот.