Протестот на Шарената Револуција кој започна вечерва во 19 часот беше прекинат на половина пат кај мостот Гоце Делчев од страна на единицата за брзо распоредување (ЕБР). Додека колоната демонстранти со чадори и кабаници и покрај силното невреме имаше намера да маршира до Уставниот суд, кој се уште не се изјаснил на уставноста на СЈО, специјалците со жив штит и неколку водени топови им го попречија патот и не дозволуваа премин понатаму.
Претходно, полициски кордон не дозволи демонстрантите да се движат ниту кон Градскиот трговски центар преку „Рекорд“ за каде што беше предвидено протестот да заврши во знак на отпор против одлуката на власта да го „преоблече“ ГТЦ во барок.
Додека полицискиот кордон на мостот „Гоце Делчев“ се засилуваше во се побројни редови, демонстрантите скандираа „Слобода“, „Убијци“ и „Ние ве плаќаме“. Беше испеан и еден дел од химната на Република Македонија, а демонстрантите на разглас ја пуштија и химната на Единицата за брзо распоредување, која ја потсетија дека, како што велат демонстрантите „штитела криминалци“.
Во период од околу еден час, демонстрантите непрекинато изразуваа револт од кордонот кој им го попречи патот.
-Бевте три реда, застанавте шеснаесет реда засилување, a одовде ние мокри. Против кого? Еден ден кога ќе се погледнете пред огледало, ќе се срамите што сте правеле. Јас од ништо нема да се срамам, јас ќе бидам горда, и моите деца и внуци се горди,а вие ќе се срамите, им рече една од демонстрантките на полицијата.
Протестот заврши на мостот во 21 часот, без инциденти.