Вицепремиерот и министер за одбрана Радмила Шекеринска денеска ќе се обрати на свеченоста по повод одбележувањето на 10 Јуни – Денот на воздухопловниот ВИНГ. Во рамки на свеченоста во касарната „Страшо Пинџур“ во Петровец се предвидени летови на армиската авијација, но и редовна воздушна полициска патрола на НАТО со Ф-16 ловци што почна со македонското полноправно членство во Алијансата, а кое согласно техничкиот аранжман го реализира военото воздухопловство на Република Грција.
Надлетувањето над Скопје со група на воздухплови, како што е најавено, ќе се одржи меѓу 12 и 13 часот. Групата ќе биде формирана од девет воздухоплови и планирано е да лета во формација 3-2-2-2 и тоа: три хеликоптери Ми-17, како водители на група, два хеликоптера Ми-24, два хеликоптери Bell-206 и два авиони ZLIN-242L.
„Се надеваме дека граѓаните на Град Скопје ќе уживаат во прелетот на воздухопловите на Армијата на Република Северна Македонија. Од името на сите припадници на Воздухопловниот ВИНГ, во време на светската пандемија од Ковид-19, на граѓаните на Република Северна Македонија им посакуваме да останат во добро здравје и ведар дух, да ги почитуваат препораките за заштита, а на сите заболени им посакуваме поскоро оздравување и закрепнување“, стои во писмената изјава на мајор Сашо Павловски.