Пет проценти од возрасните Британци не веруваат дека Холокаустот се случил, а еден од 12 смета дека информациите се „преувеличани“, покажа истражувањето кое го спроведе фондација за спомен на жртвите од Холокаустот.
Во анкетата биле опфатени 2.000 луѓе.
Речиси две третини од испитаниците не можеле да кажат колку Евреи биле убиени или “грубо” го проценувале бројот.
Денеска на Меѓународниот ден за сеќавање, стотици илјади луѓе ќе се соберат низ целиот свет за да го одбележат Денот на жртвите.
Стивен Франк кој е меѓу 90 деца кои го преживеале нацистичкиот логор Терезиенштат во денешна Чешка, заедно со неговите двајца браќа, изјави дека наодите од истражувањето се “ужасно загрижувачки”.
„Според моето искуство, луѓето не разбираат што се случило за време на Холокаустот и тоа е една од причините зошто сум толку посветен на споделување на она што се случи со мене.
Единствениот начин да се бориме против овој вид негирање и антисемитизам е со вистината – им кажувам на луѓето што се случило, што видов и што доживеав”.
Образованието е толку важно. Ако го игнорираме минатото, се плашам дека историјата ќе се повтори“ вели Франк за ББС.
Главниот извршен директор на фондацијата , Оливија Маркс-Волдман, рече: „Таквото широко распространето незнаење, па дури и негирањето е шокантно.
Без основно разбирање за оваа понова историја, ние сме во опасност да заборавиме до каде може да доведе недостигот на почит кон разликите и непријателството кон другите“.
По повод 27 јануари, Меѓународниот ден на сеќавање на Холокаустот, во македонското Министерството за надворешни работи беше отворена изложба на тема „Изгубениот свет на сефардските Евреи од Западниот Балкан“.
Генералното собрание на Обединетите Нации пред 12 години одлучи да им се оддава почит на жртвите на холокаустот на 27 јануари, датумот кога пред 68 години престана да функционира нацистичкиот концентарциски логор Аушвиц.
Во резолуцијата на Светската организација со која се прогласува за Меѓународниот ден на Холокаустот се повикува на почит и спомен на жртвите и на изработка на образовни програми со цел ваквите настани од историјата никогаш да не се повторат.