Рокот за поднесување тужби од партиите против решенијата на Државната изборна комисија (ДИК) за приговорите за првиот круг од локалните избори што се одржаа на 15 октомври истекува денеска во 11 часот.
Управниот суд по тужбите, доколку ги има, треба да донесе одлука 48 часа од нивното поднесување.
До синоќа до 21 часот ниту една партија немаше поднесено тужба до Управниот суд. ВМРО- ДПМНЕ имаше најмногу приговори, а лидерот на партијата во интервју на телевизија „Алфа“ рече дека овие избори биле најнедемократските досега.
„Имаше страшен терор, уцени, закани, заплашување и многу поткуп на гласачите од страна на актуелната власт во досега невидени размери. Сево ова се случувало и во минатото на други избори, но во вакви размери, јас не се сеќавам дека имало во Република Македонија. Практично, имавме убиен човек во изборите, кандидат за градоначалник и актуелен градоначалник со скршен череп, искршени изборни штабови. Кога се случува сето ова, можете да замислите што се си помислува обичниот човек. Ова беа африкански избори“, рече Груевски.
Освен најголемата опозициска партија, по еден приговор до ДИК поднесоа ТМРО, Левица и „Алијанса за Албанците“.