На денешната седница, владата на дневен ред треба да изгласа заклучок со кој ќе му наложи на Собранието да распише оглас за избор на нов Републички јавен обвинител.
Откако ќе биде распишан конкурсот, тој ќе биде отворен 15 дена. По ова, сите биографии на кандидатите ќе бидат испратени до Советот на јавни обвинители кој ќе има 15 дена рок за да даде позитивно или негативно мислење за кандидатите. Овие мислења Советот ќе ги испрати до владата која на наредната седница откако ќе ги добие мислењата ќе треба да избере еден кандидат кој од Советот добил позитивно мислење. Биографијата на избраниот кандидат се испраќа до Собранието со препорака тој да биде избран за нов Републички јавен обвинител кое со 61 глас „за“ ќе треба да го одобри изборот на кандидатот.
Конкретниот рок кога ќе се избере јавен обвинител се уште не се знае, затоа што според членот 8а од Изборниот законик, според кој од распишување на изборите до конституирање на општинските совети, не може да се започне постапка за вработување на нови лица или постапка за престанок на работен однос во државни и јавни институции, а започнатите постапки се ставаат во мирување.
На предлог на Владата, Собранието на 17 август по 12 дневна дебата го разреши Марко Зврлевски од функцијата јавен обвинител на Република Македонија.
Меѓу причините за разрешувањето Владата наведе дека Зврлевски ја вршел функцијата незаконито, ненавремено и недоволно стручно. Со своето однесување и дејствување, според Владата, покажал дека не е способен за извршување на функцијата и го нарушил нејзиниот углед.
Бидејќи се работи за долга процедура, очекувањата се дека новиот јавен обвинител ќе биде избран дури по локалните избори.
Мандатот на државниот јавен обвинител е шест години со право на повторно именување.
Адвокатите Звонко Давидовиќ, Александар Тортевски, Александар Наков и Сејфула Османи најавија дека ќе се кандидираат за оваа функција.