Десет компјутери и исто толку печатачи му донираше Турската агенција за соработка и координација (ТИКА) на Уставниот суд. Како што рече претседателката на Уставниот суд, Добрила Кацарска, заблагодарувајќи се за донацијата, компјутерите ќе помогнат за поажурно работење на судиите и советниците.
Според Кацарска, ова не е прва донација од ТИКА за Уставниот суд.
ТИКА долги години му помага на Уставниот суд, а денеска донираше 10 компјутери и 10 печатачи. Тоа е голема помош за нас. Компјутерите ќе помогнат за поажурно работење, како на судиите, така и на советниците на судот, рече Кацарска.
Според неа, ТИКА претходно донирала и финансиска поддршка за реновирање на салата за состаноци, средби и прес-конференции во Судот.
Координаторот на ТИКА во Скопје, Мехмет Бајрак, истакнаа дека денешната донација во компјутери и печатачи е продолжение на долгорочната соработка со Уставниот суд.
„Од 2005 година реализираме проекти, програми и активности во соработка со државни институции во Северна Македонија, почнувајќи од здравство, образование, култура, правосудство, инфраструктура, земјоделство и други значајни области. Многу големо значање за нас е соработката со државните институции на Северна Македонија. Досега, во правосудтсвото, имаме реализирано многу значајни проекти – во основни судови, Апелацискиот суд – Скопје, Врховниот суд, Судскиот совет, многу значајни соработки сме имале до денес“, рече Бајрак.
Тој напомена дека соработката со Уставниот суд почнала во 2013 година со поддршка во техничка опрема, а продолжила во 2020 година со обезбедување поддршка во опрема и реновирање на салата за состаноци.
„Многу е важно ако придонесуваме за подобрување на условите во Судот и неговите вработени“, потенцира Бајрак.
По промовирањето на донацијата, тој и Кацарска посетија неколку канцеларии во кои, како што рекоа, ќе бидат инсталирани компјутерите и печатачите.