Десетици домаќинства во општината Зелениково останаа без струја, завеани во снегот. Граѓаните се жалат дека во споредните улички снегот не е исчистен и дека е целосно непроодно и завеано, а од рано утринава немаат ни струја.
Граѓаните утрово се јавиле во ЕВН, од таму им рекле дека проблемот е во далноводот кој откажал и дека работат на санирање на дефектот.
„Јас кога станав, околу 6 часот, струја немаше. Најверојатно снемало во текот на вечерта. Не сум излегла надвор да видам каква е ситуацијата, затоа што е непроодно, а јас сум сама“, ни рече М.Н, жителка на селото.
Таа вели дека ниту една година, снегот од споредните улички не бил исчистен, па ниту оваа година не се надеваат дека нешто ќе биде поинаку.
„Секоја година е вака. Снегот од уличките споредни никогаш не е исчистен. Општината не си ја врши својата работа“, додаде таа.
Од ЕВН за НОВА велат дека од влажниот снег дошло до кинење на каблите, но дека веќе дел од домаќинствата имаат струја.
„Генерално дистрибутивниот систем за снабдување со електрична енергија е стабилен на високо ниво, на среден напон и на низок напон има проблем. На низок напон проблеми има во Скопје, Гевгелија, Битола, Велес и Струмица и Кичево. Во скопскиот регион, дел од Петровец, Зелениково, населбата Јане Сандански, депонијата Дрисла и Драчево имаат прекини во снабдувањето, а причини се скинати проводници од влажниот снег и интензивните врнежи изминативе денови. Екипите на ЕВН се ангажирани на сите овие места, како се откриваат дефектите , се санираат и се пуштаат под напон. Проблем имаме и со пристапноста до одредени локации, затоа можеби ќе биде потребно подолго време додека некој дефект биде саниран“, велат од ЕВН.
Од ЕВН апелираат, граѓаните ако наидат на скинат проводник бидејќи не се знае дали е под напон, да не го допираат, додека екипите не дојдат да го санираат проблемот.