Десетици илјади млади лекари денеска го почнаа тридневниот штрајк ширум Велика Британија, што ќе предизвика општо нарушување во работата на државните болници и клиники.
Младите лекари претставуваат 45 отсто од сите лекари во британската Национална здравствена служба (NHS). Кога тие штрајкуваат, тоа значи дека на илјадници пациенти ќе им бидат откажани прегледите и операциите.
Британската медицинска асоцијација соопшти дека платите на помладите лекари се намалени за 26 отсто во реални услови од 2008 година, додека обемот на работа и листите на чекање на пациентите се на рекордно високо ниво. Тие велат дека заморот од прекумерната работа и британската криза со трошоците за живот ги оддалечуваат десетиците лекари од јавната здравствена служба.
Дваесет и деветгодишната Ребека Лисман, специјализант по гинекологија и акушерство, рече дека младите лекари само бараат плата што одговара на нивната стручност.
Другите здравствени работници, вклучително и болничарите, организираа штрајкови во последниве месеци за да бараат подобри плати и услови.
Според Националната здравствена служба, повеќе од 100.000 прегледи веќе се одложени оваа зима како резултат на штрајкот на болничарите.
Британскиот премиер Риши Сунак вчера изјави дека е разочарувачки што младите лекари не влегле во преговори со Владата. Синдикатот на лекарите вели дека официјалните претставници со месеци одбиваат да ги разгледаат нивните барања и дека неодамнешните повици за разговори се направени со „неприфатливи“ предуслови.
Штрајкот на лекарите оваа недела ќе се совпадне со масовниот штрајк на десетици илјади наставници и вработени во државните служби во среда, на денот кога Владата ќе го објави својот најнов извештај за буџетот.