Денеска стапува во сила новиот Закон за Јавното обинителство. Специјалното јавно обвинителство (СЈО), како институција, формално згасна, но не и предметите што ги отвори. Сите предмети се живи, новиот Закон дава јасна правна основа за нивно продолжување до конечни судски одлуки, изјави за министерката за правда, Рената Дескоска.
Борбата против криминалот и корупцијата, како што посочи таа, е долга и макотрпна и тоа се гледа не само кај нас, туку и во сите други држави.
„Земете ја Италија за пример која со години се бори со мафијата. Јасно е дека нема инстант решенија за правда, но тоа не треба да ја обесхрабри желбата за правда, ентузијазмот и посветеноста на институциите во борбата, ниту очекувањата на граѓаните за правда“, вели Дескоска.
Според неа, обврската да се врати довербата во правосудните органи е најтешката и најзначајна пред нас.
„Сега со зголемен буџет и отворен пат за зголемување на бројот на обвинителите, очекувам ентузијазам и пожртвуваност од сите обвинители, истражители и стручни соработници во борбата против организираниот криминал и корупцијата, како и ефикасност во завршувањето на сите отпочнати постапки“, додаде Дескоска.